VESTIARIUM

VESTIARIUM

cimeliarchium, gazophylacium: Locus in Ecclesiis, quô vestes, thesauri, et suppellex sacra reponitur, βιςτιαρια. Vide Augustin. ep. 109. Meminit enim Ezechiel Propheta, ubi de Sacerdotum procurationibus et cameris eorum sanctis c. 42. v. 14. Et quando Sacerdotes ipsi ingrediuntur, non egredientur de Sancto in Atrium exterius, sed ibi reponant vestes suas, in quibus ministraverunt, sunt enim sanctae atque aliis vestibus sese induant et accedant, ubi es Populus. Et paulo post, c. 44. v. 19. Et quando egrediuntur ad Atrium exterius, ad Atrium inquam exterius, ad Populum, exuant vestimenta sua, in quibus ministrabant et repoant in Conclavi Sanctuarii (Graeci εν ταῖς ἐξέδραις τῶ ἁγίων, in Exedris seu Repositoriis Sanctorum, Vulgatus in Gazophylacio Sanctuarii) induantque vestimenta alia. Vide Iarchium, Kimchium et Ioh. Villalpandum, Explanat. part. 2. l. 4. c. 69. Neque vero unum solum, sed plura eorum, in Templo Hebraeorum fuisse oportet, cum Vestium Sacerdotalium magna copia, et mutatoriae earum complures essent, quae in Templi solum Vestiariis servabantur: ut de reliqua supellectile sacra, quae magnâ quoque praesto erat copiâ, ut, si forte pollueretur una, altera locum eius statim suppleret, nil dicam. Vide Maimonidem, hal. Celi hammikdash, c. 7. §. 19. Imo idem Auctor. l. eôd. c. 8. §. 5. 6. etc. numerum eorum definiens ait, Sacerdotibus vulgaribus seu minoribus, faciebant vestes mutatorias complures. Et nonaginta sex Arcae erant in Templo, ut in illis relinquerentur seu reponerentur vestes illae. Quatuor scilicet cuique Custodiae sive Ephemeriae. Et nomen Ephemeriae cuiusque erat inscriprtum Arcis suis, quae cunctae clausae. Et quando Ephemeriae Ministri intrabant, ad operandum in bebdomadibus suis, recludebant Arcas suas, singulis hebdomadum suarum diebus, instrumenta illa vestiaria sibi tollentes. Et cum egrederentur (e Templo) reponebant vestes illas in Arcis suis easque claudebant. (seu obserabant) Ratio autem, cur fierent quatuor Arcae cuilibet Ephemeriae, erat, ne instrumenta illa inter se confunderentur, adeoque ut femoralia omnia Arca in una continerentur, inscriptâ nomine Femoralium; uti etiam cingula cuncta, Arca in unica inscriptâ nomine Cinguli, et pilei omnes Arca in unica, et demum tunicae Arca itidem in unica. Pontifex autem Summus relinquebat vestimenta sua aurea in conclavi suo nocte ac tempore, quô egrediebatur e Templo. Ita praefatus Auctor de Sacerdotum vulgarium repositoriis. Non autem solum vestes, quae usui adhuc erant, reponebantur in Vestiario, sed cum Sacerdotum vestes sordidiores factae aut inquinatae ad conficienda ellychnia aliaque id genus seponerentur, vestis Pontificis vetustate attrita, in Gazophylacio recondebatur, etc. Vide Ioh. Seldenum, de Synedriis Veter. Hebraeorum, l. 3. c. 11. De rei Vestiariae vero Praefecto, infra: at de Vestiario Romanorum Imperatorum, Pancirollum ad Not. Imper. Orient. c. 81. uti de Vestiariis Patriarchiorum, et Monasteeriorum, Car. du Fresne in Glossar, Templorum item, Dominic. Macrum, voce Sacristia. Sed et sua privatis aedibus non defuêre Vestiaria, Graec. ἱματοφυλάκια, in quibus vestimenta omnia generis, Tricliniaria, Virilia, Puerilia, Muliebria, Communia, Familiaria, Scenica, Funebria, Alia, reponerentur. Et quidem pretiosae vestes, et quae raro usurparentur, quaeque diebus solum festis sumerentur, in iis per syntheses disponebantur; ut sericae, subsericae et id genus clarae raraeque vestes: quae vero quoridie adhibebantur, ita ordinari haud quaquam solebant. Quô factum ut Syntheses Romanis

dicerentur quoque vestes ipsae, quae sic in synthesi disponebantur: et Synthesina vestis, pro sumptuosa ac pretiosa caperetur. Meminit istiusmodi arcarum et synthesium Martialis, l. 2. Epigr. 46. in Naevolum.

Florida per varios ut pingitur Hybla colores;

Cum breve Sicaniae ver populantur apes:

Sic tua suppositis pellucent praela lacernis:

Sic micat innumeris arcula synthesibus.

Claudebantur vero et hae arcae seris ac clavibus, quarum custodia peves servum frequenter fuit. Quam ob rem idem Poeta Euclidem notavit, l. 5. Epigr. 37. v. 6.

Equiti superbo, nobili, locupleti,

Cecidit repente magna de sinu clavis.

Cuiusmodi clavium iconas aliquot exhibet Laur. Pignorius, Comm. de Servis. Qui autem ex Vestiariis depromebant ibique iterum tecondebant, modo ad Vestem, modo a Veste, modo Vestitores appellati sunt, de quibus infra agetur.